Մեր պատմությունը
Թվինզն առողջությունը, էկոլոգիապես մաքուր պրոդուկտները, եզակի դիզայնը գնահատող մարդկանց համար է, ովքեր հավատում են, որ ձեռքով պատրաստված իրերը հոգի ունեն։
-Բաբկեն Խաչատրյան
Համահիմնադիր
Ամեն ինչ սկսվեց մի ծառից
Գյումրիի մեր ընտանեկան բակում աճում էր մի հին թթենի։ Նրա ստվերում անցել էր մեր մանկությունը, հավաքվել էին ընտանիքի անդամներն ու ծնվել բազմաթիվ հիշողություններ։
Երբ ծառը կտրվեց, ցանկացանք պահպանել նրա պատմությունը և փայտին նոր կյանք տալ։
Երկու եղբայր, մեկ գաղափար
Մենք երկու եղբայր ենք՝ Բաբկենը և Դավիթը։
Բաբկենի դիզայներական փորձն ու Դավիթի ոսկերչական վարպետությունը միավորվեցին մեկ գաղափարի շուրջ՝ ստեղծել փայտե ակնոցներ, որոնք կունենան ոչ միայն ձև, այլև բնույթ ու հոգի։
2014 թվականին սկսեցինք առաջին փորձարկումները։ Ուսումնասիրում էինք փայտի հնարավորությունները, փորձարկում տարբեր կառուցվածքներ և կատարելագործում յուրաքանչյուր փուլ։
2016 թվականին հիմնադրվեց Twinz-ը։
Արմատներից ծնված դիզայն
Twinz անունը խորհրդանշում է երկու եղբայրների միությունը։
Այսօր յուրաքանչյուր Twinz ակնոց նախագծվում և ձեռքով պատրաստվում է Գյումրիում։ Մենք համադրում ենք բնական նյութերը, ժամանակակից դիզայնը, տեխնոլոգիական լուծումներն ու ձեռագործ աշխատանքի ճշգրտությունը։
Փայտի յուրաքանչյուր շերտ ունի իր բնական գծերը, երանգն ու հյուսվածքը, այդ պատճառով երկու ամբողջովին նույնական Twinz ակնոց գոյություն չունի։
Մեր ընտրած ճանապարհը
Մենք մեծ ուշադրությամբ ընտրում ենք նյութերը, մշակում յուրաքանչյուր դետալ և յուրաքանչյուր ակնոցի տրամադրում այնքան ժամանակ, որքան անհրաժեշտ է լավագույն արդյունքին հասնելու համար։
Մեզ համար սա պարզապես արտադրություն չէ։ Սա մեր ընտրած ճանապարհն է՝ ստեղծել երկարատև, հարմարավետ և ինքնատիպ ակնոցներ այն մարդկանց համար, ովքեր հոգ են տանում իրենց առողջության և շրջակա միջավայրի մասին, գնահատում են յուրահատուկ դիզայնը և հավատում, որ ձեռքով ստեղծված իրերը հոգի ունեն։
Twinz — ձեռագործ ակնոցներ՝ արմատներով, բնավորությամբ և հոգով։
Մեր Գործընկերները
